Home News TSA HON ANGOHNAU ASSAM RIFLE HON DEMNA BOL

TSA HON ANGOHNAU ASSAM RIFLE HON DEMNA BOL

315
1

(By. Thangmin Touthang
Nitin Thusoh Staff Correspondent)

Achesa November nisim 12 nia Tengnoupal a Assam Rifles Vehicle Check Post a TSA GHQ General Secretary Michael Lamjathang Haokip chunga AR Jawan hon dandih loutah in achatloh uve tia November nisim 17 leh 18 nia thusoh chom chom mangcha a ngohna anei uchu jouthu bul leh bal nei lou ahi tin dem naleh nielkal na anei taovin ahi.

PRO IGAR (South) in jannia thusoh khat abol na achun Tengnoupal a Assam Rifles Vehicle Check Post hi dandih louva sumkolvei ho, adeh a khamthei, galmanchah, wildlife leh forest product hole Sana leh thilpha lou kipuo ho matdoh na dingleh cham naleh lungmuon na dinga kikoi check post ahin, November nisim 12 nilha nidan 4:30 pm vel chun Michael Lamjathang Haokip chu ama gari a check post chu ahung lhung in numei, naopang leh tehseh ban a khuoljin miho check ding ngah’a queue a ding hochun ahin makhel a amah (Michael) chesah masat dingin Jawan duty koma chun priority peh dingin asei in ahile Jawan duty chun mudang jong angah um ahin nang in jong ngah in tin ana seipeh in ahi.

Hinla Jawan ngehna chu Michael in nasah in anei pon misang’a che masat tei ding aguon, English pao helou Jawan duty chu English paovin ahoupi phat in Jawan duty chun thil umdan seitoh dingin English pao thoh thei jawan khat akouvin thil umchan chu asei lhon uvin hinla Michael chu anom deh pon masat tei ding ana guong tei tei chu kitup tah a trained Jawan chun dan dungjuia line a ding dingin ana sei jeh’a hitobang hi suoh ahin, hiche ahin AR ho mohna aum poi tin IGAR (South) chun aphongdoh in ahi.

Ajing November nisim 13 nichun Michael in Tengnoupal SP ahin jaonan 12 Assam Rifle Commandant chu Complaint lekha toh jaonan ana kimupih in, hinla thilsoh chu phat tah’a khuolchilna akinei na a Jawan Duty mohna aum lou dan mudoh ahi tin jong thuphon chun aseiye.

Chuleh AR hin gamkai sunga Chamna leh Lungmuon na aum na dinga pan alah jing bana battalion natoh hi gamkai miho, state government bana state agencies adeh a DRI, NAB leh Forest Department ho pachat hi jing ahiuvin, hitobang tohgon hi AR ho minset na ding leh uniform pum’a gamsung leh society a dinga natoh Jawan ho suhminset na ding kiguong ahi tin jong thusoh chun ngoh naleh demna anei in ahi.

Nitin Thusoh (Daily News)

1 COMMENT

LEAVE A REPLY

Please enter your comment!
Please enter your name here