Home News PM kholjin deilou jeh a Assam a nidan 12 bandh kikou

PM kholjin deilou jeh a Assam a nidan 12 bandh kikou

29
0

Guwahati, Feb 8: Jing (Feb 9) nikho leh Prime Minister Narendra Modi in Assam ahung vil ding to kilhonna, Tai Ahom Yuva Parishad (TAYP) hon kiphin vetsahnan nidan kah 12 sung bandh akou uvin ahi.

Bandh hi Citizenship (Amendment) Bill, 2016 kisuhlhap ding deina le Assam sunga community gup ho ST status kipeh ding deina a kikou ahin, hiche lah a hi Tai Ahom, Chutiya, Moran, Muttock, Koch-Rajbonghsis le tea tribes ho jong jaotha ahi.

Assam sunga rally lenpen a kiphonna a panla dinga Prime Minister Narendra Modi in Assam ahung vil dinga tahsan ahin, Guwahati khopi pam Amingaon munna rally lentah a houlimna phat anei di ahi.

CAB kikoilut ding deilouna a kiphinna nei lamkai tamtah in agihnaova Prime Minister pan agamsung ahin chotlut lutle kiphinna lentah sohdoh ding ahi atiuve.

State sunga Inner Line Permit (ILP) umsah na dingle Citizenship bill kisuhlhap ding deinan Thursday ni jingkah a chun youth organization member hon Assam sunga train lhai le lam ana suboi uve.

Guwahati, Sivasagar, Charaideo, Dibrugarh, Tinsukia, Nalbari le Udalguri ho hop in state sunga district chuom chuom a nidan kah khat tobang Asom Jatiyatabadi Yuba Chatra Parishad(AJYCP) member hon banner le placard choi in train lampi ana suboi uve, tin Police thusoh chun aseiye.

Golaghat sunga Numaligarh oil town munna kiphinna neihon Rongbong, Letekujan le Panka lhang sunga National Highway-39 lampi ting din tamtah ahung kijotdoh uve.

Legislation kilahdoh ding deinan Dibrugarh sunga Naharkatia munna Thursday nikhon All Assam Students Union (AASU) le kiloikhomna 30 akijoppi hon kiphinna lentah ana guong uve.

Source eimitime