Home News NAGALAND A ASSAM NUMEI 2 KIHUUDOH

NAGALAND A ASSAM NUMEI 2 KIHUUDOH

81
0

NT||NE Breaking News
Sunday, 07 April 2019

By. Hoineilam & Lhingneithiem
Nitin Thusoh NE Staffs Correspondents

Natohna peh dinga jou leh nal a kilhem lha a Mihem’a Sumkolvei (human trafficking) ho khut’a ana kijoh Assam akon numei 2 chu tuni sunkim vel chun NGO Sakhi One Stop Centre leh Nagaland Police hon joint operations abol naova ana huudoh taove tin Nitin Thusoh NE Staffs Correspondent report chun aseiye.

Assam numei tenih hi achesa niphabep masang Mahashivaratri nikho a chu Nagaland gamsunga natohna peh dinga jou leh nal a kilhem a kipuidoh chu Nagaland alhun uvin, hunam a human trafficking ho khut’a juoh ana hiuve ati, chuleh numei tenih hi khat Guwahati akon ahin, khat chu Tezpur akon ahiuve ati, hinla numei tenih hina leh dinmun vang phondoh in aum pon ahi.

Thilsoh toh kimat a Nitin Thusoh NE Staffs Correspondent report in aseina achun numei tenih hi mihem a sumkolvei na doudalna a natong NGO Sakhi One Stop Centre leh Nagaland police in guhthim thulhut ana muh uva joint operations abol naova kon ana huudoh uh ahin, hinla numei tenih hina dihtah aphondoh lou ban uva agahuudoh nao mun jong ana phongdoh pouvin, chuleh numei tenih puimang na a kigolna nei mi jong amatdoh leh matdoh lou ana phongdoh pouvin ahi.

India Sah-Solam gamkai hi International Border ahi toh lhon in human trafficking ho dinga munpi khat ana suohdoh tan achesa kum phabep masang akon in gamkaiya m0human trafficking case hi ahung pungcheh cheh in tukum February lha jongchun Manipur police in NGO ho kithoh in Moreh leh Imphal sung munchom chom a Nepal akon hung kipuimang numei 147 leh pasal 32 agom a mi 179 ana huudoh uvin ahi.

Chuleh Sah-Solam gamkaiya Indo-Bangla border hi human trafficking ho dinga kotpi (main door) khat ahin Union Ministry of Home Affairs record dungjui in gamgi vengbit a um Border Security Force (BSF) hon kumlui 2018 February gei chun gamgi a numei 149 ana mandoh uvin, Chuleh 2016 kum chun gamgi a numei 1062 leh capang 225 huudoh/matdoh ana hiubin, chuleh 2017 kum sung chun numei 574 leh chapang 123 huudoh/matdoh ana hi uve ati.

Nitin Thusoh (Daily News)