Home News MANIPUR A HUI LEH GUO HAT TAH KITHO, CHURACHANDPUR A NUPI 2...

MANIPUR A HUI LEH GUO HAT TAH KITHO, CHURACHANDPUR A NUPI 2 LEH KAKCHINGA NUMEI KHAT IN THINA TUOH, CHENNA IN LEH ELECTRIC POST TAMTAH SUSE

124
0

By. SP Haokip & S Boilen Haokip
Nitin Thusoh Senior Staffs

Tu jingkah nidan 10 am vel’a hetman louva Manipur sung mun phabep adeh in Churachandpur district sunga huipi leh guo hat tah akitho jeh in chenna inn tamtah amutset a nei leh gou tamtah ana suhset ban’a numei 3 in thina ana tuoh uvin ahi.

Nitin Thusoh district Corespondent hon report ahin bolnaova Churachandpur, Bishnupur leh Kakching district ahatoh khah deh in, Churachandpur district huopsung Seitol gamkai T Munnomjang leh Kulbung kikah Salemveng a huipi in inn amutsetna akon in nupi 2 in thihna ana tuoh uvin ahi, Salemveng hi khothah ADC Member Pu Chonsei kho ahi tin jong thulhut chun aseiye, chuleh khochom chom adeh in Henglep AC huopsunga chenna inn tamtah ana suhset ban’a munphabep a school asuhset jong aume ati.

Thulhut in aseina thihna tuoh nupi khat hi Kulbung ho Nemdom Doungel akitin me hol a achena a hui leh guo ahung hat phat a Salemveng a inn achu ana jamlut ahi ati.

Chuleh Churachandpur leh Bishnupur district sung a High Tention jaonan electric post tamtah ana puh in Tiddim Road a Kawkta leh Kangvai kikah a main HT post len mun 5 lang a apuhe tin jong report chun aseiye, Kakching ajong huipi thing amutlhut khat in chenna in ana khetkha na a asunga um numei khat in thina ana tuoh kit in ahi.

Langkhata tuni huipi leh guopi kithoh in mihem 3 in thinna ana tuoh keo hilouva semphat thei tah lou ding channa inn tamtah leh nei leh gou tamtah ana suhset na thilsoh hi a 17 lhinna Lok Sabha election jeh a Model Code of Conduct kal a Natural Disasters a phondoh thei ahi ahilou government in aboipi ding tahsan leh kinep aum in ahi.

Chuleh tuni thilsoh toh kimat chun tohsetna tuoh ho government a muding a lomho guonpeh dingin Kuki Khanglai Lompi in jong thilsoh chu khuolchilna anei ngal uvin, tohset tuoh hon Relief & Rehibilation Vice President Pu Nehgin Haokip 9612343607 leh Douthang Secretary Relief & Rehibilation 9612492727 a report bol dingin hetsahna thuphon abol uvin ahi.

Nitin Thusoh (Daily News)