Home Religions LUNG KHAM NAHON NAHIN BEL TIENG!

LUNG KHAM NAHON NAHIN BEL TIENG!

42
0

LUNG KHAM NAHON NAHIN BEL TIENG!

By. Rev. Lunneo Haokip

Pakai natong dia nakitepna le naki nepna banglou tah a nitin hahsetna leh boina’n nahin jui ji em? Naki nepna leh naki Ginchatna khellam peh in nitin lhepnan napui ji’ inte na! Hiteng chule Thaonusa-Pakai manchah sa khat jong chu  lhahsam nan ajui thei ji-in ahi.

Ajeh chu;

  1. THOH GIMNA ASAN VAL JITENG

Lhagaolam hinkhuoa dingin boina- hahsetna -nitin lhepna hohi kalbi dan’in ana um jieng jong le tahsa lam lungel – mihem lungel in vang Pathenin eidalhah ahidem, Pathen in ajep/eijep ahidem, ibola hiti behseh a hi eiki bol ahidem tia iki gel kan ana umjin ahi.

Pakaiya dia thil kidang tamtah ana boldoh themgao  Elijah  jeng jong chu Jezebel lengn’un  thadinga ahin hol’a, gilkel dangchah a hinkhuo aman laichun ahinkhuo beina ding-athina ding’in ana taovin ahi. Hinlah Pakaijin, “Kipatdoh in lang chen, nachena ding saotah avat nalaije” atiy.  (1king 19:5f)

Nitin Lhepna asan’a, boinan eihin habel jiteng ilhasetna le ilungneona ana umthei ji’n ahi. Hinlah Pakaijin eiman chah nom, ihinkhoa  tohdoh nom, aloupina aphon dohnom tampi hung umji ana hi jojie.

  1. SEISET LEH TAITOMNA ASAN VAL TENG.

Pathen natong hia boina tohlou, Seiset japina le minsetna tohlou koi um intem!

Apha hihen lang ase hita jong le akibol/akigel akitong jousehi hi aning khatna aphun ding, aseise ding ataitom ding ana umtei ji’n ahi. Hiteng chule Pathen Lhagaovin lungel lhahna (decision lahna eineisahpa) juilouva mihem hina lungel a ichal lhah teng chule lunglhahna/kigel setna/ Lhasetna/thasetnan eihin juipai jitai.

Alang khatna satan in jong Lhacha/Pathen natong khat chu aphatna hihen asetna hijongle seiset taitoma auma, alungneova a Pathen natohna muna alosam ding chu sunle jana aboipia asuhboi got jing ahijie.

Satan manchah ihilam hepha louvin mipiten jong Pathen le mipi kikah a lamkai Lhacha ho seisetna leh dounan pan nasatah in ina lajiuve.

(Acts 7:51, Matt 23)

Themmona neilou i Pakai chun nangle kei ding jeh in jepna, themmona, taitomna le thina chan gei gotna ana toh in ahi. Ama thohna chu vetton-vetjuijin nei uhite. (1Peter 3:14)

  1. LUNG LENGVAI NA AUM JITENG

Pastor khat hi asopi khat athini hin alhisoh-akap in ahileh mikim khat chun, “Pastor khat hija asopi thi jeh in akap’e  atiuvin,

kum phabep jouhin asopi thini khat hin pastor pachu akap go’n ahile mipihon agel kheljie ti ahet jeh chun asopiho thina chu apohnat lheh vangin kaplouvin akitim ham ham’e. Hinlah mipihon, “Lhacha khat hija asopi thina jong apohnat hu theipoi/asopi thini kisen in jong alainat hutheipoi amitlhi jong alongpoi” ati kit uvin ahi.

Mipiho lunggel chun Lhacha khat chu phattin’a lhagaova hal jing ding, bukim jing dinga agel’u ahijeh chun amahoa hinkhuoa nitin boina ho member ho koma share gabol dinghi thilnom behseh ahijipon ahi.  Hijeh chun Lhacha atamjo hin alungel seina ding/kihoulim piding beija hinkhuo amanna alung lengvaina le lunglhahna tampi aum jin ahi.

Chukitle itobang hahsetna-boina chung nung umjong le kihetmosah a, selguh jing puma mipite maiya kipahtah banga dingjing ahiuve. Ahinkhouva aboinao jouse kihetmosah puma midang taopieh a lhamonna, tilkhouna le vangbohna neijing ahiuve. Hiti ho jouse akona galkai theina lampi umsun chu “Taona” leh Bible sim akon bou ahi.(Phil 3:10)

  1. LHING LEL KISAH VAL JEH IN

Pathen mikou dan le manchah dan hi akibang pon, Evangelist/missionary ( kipana thupha lhangsap le dinga) dia kouna changloi, Pastor dia (Chinghoi kaihoi dia) kouna changloi, Lasah theina, Natoh lama, Taona lama, ihinao dungjuiya thilpeh kibang loucheh kichang ahijeh in eima eikipe toh midanga kipe boltheina thilpieh ho vetkah -tekahna kibolto jihi lhagao lam kalsena dia poison phatah ana hijin ahi.

Nangma khutna um (Mose tenggol) chu ipi ham kihet’in lang, Pathen in ajah a ( amanchah) tengle bou lolhing ding ahi ti gel doh jing in.(Exo 4:20)

Lhacha insung kimkhat hi hahsetna ngen in ajui, Ling leh khaovin atuom jing jong aumjin, Amaho insung tahtah hi amimo/alhasam/alamvai adimset jin, kimkhat chun itia pastorpa insung lailai hitia hi umham, a insung avekol joupoi tia phun jong aumjin ahi.

Lamkhatna adihna jong aumnai. Hinlah Workshop ma gari ase abal simsen lou semdia kikoi/hung kikoi be jing ahi bang khun, Lhagaolam mopo lamkai ho insungle hinkhoa jong alou theiloua aboipi diu/mopohna le ngense na jong kichat louva ana umji ahijoi. Lamkhatna satan in jong mimal hinkhuo le insunghi nasatah a nitina suhlamvai dia aboipi jing ahi kit e.

(Jer 3:15, 2Cor 12:9)

THUCHAINA

Sepai galvon kivon khat hia melma neilou koi um ding ham, Pathen natong khat hia lhepna tohlou/neilou um ding ham!

Hijeh chun Chingtheijin vo ching- huoi, kaihuoi lamkai pipuiho!

Satan in nitin’in

kipallhuh sah ding,

suh lungneo ding,

suhlam vai ding,

suh lhasam ding

Suhmang dingin eivel jing uve.

Chihna-thepna le boltheina hoa kisong louvin Eikoupao le eihatsah pao Pathen Lhagao thilbol theina song pum’in kal song jing uhite. (Phil 4:13)