Home NGAIDAN (OPINION) LEISET A KANGAIPEN SANGIN CHRISTA LHENG JOTANGE

LEISET A KANGAIPEN SANGIN CHRISTA LHENG JOTANGE

338
1

 

LEISET A KANGAIPEN SANGIN CHRISTA LHENG JOTANGE

Story by Crosby Haokip

Nungah gollhan laia kilungset-kingai hi hinkhoa athupi pen leh alouthei lou thilkhat ahi. Akingai jouse kicheng tei² ding ahidehpoi. Hijongle nadongma toh nakiboi jeh ham ahiloule nakikhen lhon jeh a thilse thilpha lou nalunggenthei na ho suhmilna dinga nabol khah em? Julesa ne leng kadongmanun hin ponan tin hung kile kit inte tia kinem gollhang ho avangse ahiuve, chule amale ama kithat ho avangse dehset ui. Hitobang chu ken jong kanatoh e. Kei hinkhoa konin kitilkhou un:

Hung gollhang pan² akihi jehin dongma nei ding chu kagelle katha anom lheh jengin ahivang in mijahchase kahie. Aguh a nungah melhoi ana kithimvet pan ahitai. Chapang cha akihivang chun nungah hoithim imu le jan imut phat le ilunggel a story kipan ji ahitai. Nungah idei jong chu isanga kum 4 beh a atah lou le kidei kit lou ahi. Kei lunggel hin toh kha jong mitam inte ong?
Thinglhang a kium ahijehchun lekhasim na lama akilhasam in sim jong akisim nompon hijehchun class 10 kachai in aban kajom tapoi. Nungah hela hinkho nomtah man ding chu keima tup le doi thupi pen chu anahitai. Hijehchun lekha sim sanga hinkhoa natoh ding chu kana nom jotai. Kanu in kalekhasim lou ding adeilou vangin keima kakidoi lou jehchun cha changkhat seh kahi jeh jong chun kada sasan eibol nompon keima lunglheina ding ahipoule einop peh tai. Guhthima nungah kan lungset le kan dei phat chu ahungsot lheh tan atah beh² a po doh dingin kahung kigellha tai.

Kakho sung uva chun nungah melhoi tah khat aumin amin jong Jennifer akitin ahi. Amel ahoiyin, asangin chule keisanga kum1 bep a tah ahin a aw jong anem lheh jenge. Guhthima kana vet² jing nu chu ahitai. Chapang akihi nalai toh gah jol ding chula kakisonglal in kalungset na kisei vaigei kit le mi melhoi ahijeh chun midang toh hung kingai kha le kapoh joukit lou ding- hitichun lunggenthei tahin hinkho kana mangkha tai. Kalungset val jehchun kahin kivop pi pantai. Jingkah nilhahseh le a in uva kholai lengin kachen nehthei kacho ji in totna ho kasei khom jilhon in nomtahin hinkho kahin mangpan lhontai. Kalungsetna sei jeng ding kati le ajole loile pai banga eikivoppi mei² hikhan tin kathusei ho jehin kakikah lhon boi khante kati kit jie.

Loile pai banga kahung kivop jing lhona pat in kahinkho jong anomin aman jong eihom tho lheh e.

Kahung kivop khom na lhon jong ahung sottan koi nungah-gollhang kingai sangin keini kingaina chu asang lhehin khat jao lou a khat hithei lou kabang lhon tai.

Kalungset na kasei ngamlou vangin kapo jou tapon nikhat hi Jennifer kalungset na hetdoh sah tei ding tin(kakam a kasei ngamlou jeh chun) letter kajit tai. Kaletter jit chu anaopa kapehsah in kajahchat val jeh chun adammo bangin lupna senan kakinei tai. In a kona potdoh a Jennifer mu ding chu kakicha leotai. Chutia kakingaito laitah chun Jennifer kain uva ahungin;
Jennifer: “henu minlal hoiya um ham?”
Kanu: “Damlou hinah ta lupna lum khu”
Jennifer:  “Henu minlal itidamlou ham? Hadam mo ham? Lou aumlou le kaga holpeh ding ham?”
Kanu: “Ipi hadam mo ding ham nungah ngai hinah ta” tin atot in…..
Jennifer: “ te henu nungah ngai ahile pui peh kom tang uvo ajole hadam mo get inte” tin atot lhon in…. “ Minlal dam le kalou uva ankam sih in kiche khom hen kiti” an ti laitah chun kajaman pon kakithou kin chelin
Keima : “Jennifer nahung ham”
Jennifer: “lou a che khompi ding a nahung kisei goa nana damkit lou nungah puldou hikit nalai” tin ahung tot in
Keima : “ heiha tulah hi nangpul kidou tahi” tin kale tot le ajahcha in
Jennifer: “ hinahta2 nakiletsah2 toh” tin in le dai in che jouvin lou langa che dingin kahung kipan doh lhon tai.

Keima:  “Jennifer ankam lou in che te nati lou ham hoiche ham apoh na ding”
Jennifer: “cho kihetmo sah hihin ajoulang a letter kamu chu nang nahi mong² hinam ti kahet nom ahie”
Keima:  “ henge keima kahinai, sot a pat a lungset kahin chan nahitai hijongle kisonlal na a kadim jeha kana seidoh ngamlou ahie. Hijeha chu tunia chu kalungset na thu sei dinga letter kahin sol ahi. Hijehchun kalungsetna hi iti nagel em. Force in jong nabol ponge. Nangma kigellhah ding kanome”

Jennifer: Min ken jong sot a pat a kana lungset jing nahie. Kei jong kisonlal na a kadim ahie. Nangin lungset nathu nahin sei masat ding kanga jing ahin, chutia lungset nei chan le kei jong kanome” ati chun kakipa dan
chu hiche nibanga kakipa na ding aumpoi. Hiche nia pat chun kilungset hinkho kahin mangpan lhontai.

Jennifer toh kahung kilungset lhon a pat in hinkho kikhelna kahin nei in nehle chah phalou kaneh ho jong kanungsunin hitichun kanu thu thun kanungin kanu kakipasah lhehe. Jennifer jong ka in uva ahung kholai leng jin kanu kithopina thei² in ahung kithopi jie. Keini kilungset chu kanun jong aphat sah jehchun Jennifer chu hinkhoa ding mong² in confirm kana boltan ahi.
Ka lunggenthei kom jongle eikipasah in eilha mon jin hitichun keiman kilhamon nan kahin neipan tai. Ken jong kalungset lheh jengin keini eisukhen thei ding ima umtaponte tin kana gelle.

Jennifer school kai nalai ahijehchun lhakhat jouvin ama jong Imphala in bahara aumna jon kit ding in aumtan ahile kalung ahel lheh jengin ache nungle apul kadou ding ho kagelle thima kangap jon ahi. Hijongle aman hoitah a eilhamon a _suty ka hung kit tengle nangtoh iumkhom ding ahitai_ ati jeh chun kalung among ham² in ahi. Kingai lheh hon jongleng ama jong themjilna mun ajot tei angai jeh chun ama jong ache tan ahi. Kalungset pen nu potdoh a pat in kangai lheh jengin kalhi soh² tan ahi. Christmas ahung lhuna nomtaha kaum khom ding ngahlal in phat le nikho kasim² tan ahi.

Phat le nikho ache2 tan December lha lhunna ding lhakhat bou avat tai.

Chavangkut ni chun kalung ahel lheh jenge. Jennifer kangaina chu asang dehset in ahi. Hijehchun kei jong Jennifer te in a kaga kholai lengin ahile anule apa lung ngoitahin ana tou lhon in-
*Keima* _“henu tunilhah chu ipi ti nahilhon ham? Nadam lhon lou ham? Ole ipi thu um hitam”_ kati le anu jong lhisoh pum² in
*Anu* _“Jennifer_jen_ni_fer”_ tin kap pumin
*Keima* “Jennifer ipi ti ham henu. Ole damlou ham” kati le anun
*Anu* _“ahipoi Minlal Jennifer ajinei tai tunilhah le apasal te kiphong a hung diu ahi”_ atichun kachom mang dehchet in kakap dentan ahi. Kapona behseh in jahchat lam helouvin kachuti ka tan ahile kanu ahung lheilut in thilsoh umchan ho ahet chun apona lheh jenge.

Nilhah le kiphong a hung diu ahijehchun kathoh joupon kalou lang uva kachen buh sunga kaga kap² tai. Hin jong kahin nomtapon thi ding bou kanomtai. Kalungset pen in eidalhah chu kei dinga hinlo jong aumtapon mitlhi hul joulouvin kakap² tai.
Kiphong a hung ho kinung le jouvin kei jong khojin konin inlam kahin jontai. Hiche nia pat chun an jong kane nomtapon, jan imu theilouvin hinkho kamang² tai. Ka hinkho man chu kanu gentheina bep ahidoh tai. Ajehchu an jong kane tapon kacha pa hin thi ding bou anga ahitai ti chu ahet jehchun guhthimin alhisoh2 tan ahi.

Nilhah khat hi kanun eihin thoukhang in kajah a, _“Boi Jennifer in lekha nanthot e hung kilah in”_ atin kei jong kache le kanun, _“boi an kam khat beh hijongle ne tadin chujou le nape nange”_ atin ahile kei jong kanomin an kanen kaneh jouvin letter chu kasim tai—-
*“Heu neingaidam o thiljouse hi kei themmona ngen ahie. Nang kalungsetna vang akempoi. Kei jong kanop a jinei kahipoi. Kaumna a kona thal le hem mangcha ei eiguhdoh tho u ahibouve. Iumnau agamlat jeha thiljouse hi boi kha ahibouve. Kei hi agenthei dinga um kahitai hijongle nangvang nagenthei ding kaphalpoi. Keisanga pha jole hoijo Pathen in nape nante. Kei neingai jeha an ne lou a naum chu kapo joupoi. Kei neilungset jal chun an ana ne ji ta o heu. Nang nagenthei le nanao kei kagenthei ding nang nanopsah le nanao kei jong kanop sah ding ahie. Nahinlungset jing Nanao Jennifer”* kasim jouvin kitim joulouvin kakap tan ahi.

Kalung among thei mong² tapon hijehchun kanun lamka langa um dingin eihin puidoh tan ahi. Jennifer lamka a jinei ahijeh chun kalung ahel cheh kitin ahi. Kalung amon joulou phat in judon a Jennifer suhmil ding tin kahin don pantai. Nilhah jingkah sun tia khen louvin kahung kham pantai. Houin jong kakai nompon Pathen thu lamchu kalunglut na hilou ahijnge. Kahinkho man chun kanu asugenthei lheh tai.

Jule sa a kalung amon joulou phatin khamna thei louchang kahin ne pan tai. Khamna theiyin katahsa ajoutan kadammo mo jengtai. Kalupna koma kanu lhisoh puma tou chu kave ngam kitpon thi ding bou kanomtai. Thikit dingla kanu hinkho man dingdan kigelle kalung agim kit in genthei tahin hinkho kamangtan ahi.

Khamna thei hon katahsa aneh² phat in kahung ha dammo tan Hospital a eipolut tauve. Dr hon eiveuvin alungdong tauve. Thi tei ding kahi chula aheuvin keima vang eihetsah nompouve. Mihem in ithi konle idamlai a ibolkhel ho jouse ban neichan ahung kilange atiu khu atah² ahi. Thitei ding chula kahitan tua kathi le tonsot meidil lama che ding kahi kakihet tai. _“Henu ipi kati ding ham? Kache na ding mun ahahsa e”_ tin kakap² tan ahi. _“Pakai phat chomkhat beh hijong le neipe ta di o. Nalungdei kaboldoh hihlaiye”_ tin katao tao jeng tan ahi. Katao jinglai in ka phone ringtone ahung gingin ringtone a kaman la chu ahung kilhan ahi- *“Damlai hinkho phat chomcha kanei sungin leiset a nopsah nan hinkho kana mangin hinlah tunin Christa jalin nungsun tange…..”* tia Hoineichong in asah chu ahi. Hiche phat chun kalung ahung kikhel in kachonna kathilbol ho kakisih in Pakai koma kachonset ka phongin kalupna jalkhun a Jesu kakisan tai. Hiche phat chun kamai chu kipana lonlhin achup tai. Kahinkhon hitobang kipana kanei khapoi. Kaphat chesa ho kangai in ahinla kakou kit thei poi. _”Pakai leiset lungngei najehin nangma kanasumil in tuchan in nathu tailou monna kanei poi. Nang sanga ka dongma, kaloi kagolho kana gelkhoh jehin neingaidam in tunin kaleiset hinkho bei konin *Leiset a kangaipen sangin Christa lheng jotange* Jesu nagam nalhun tengle neihe jing tango”_ tin Pakai ang a kalhagao hinkho kape dohtai.

*Thuchaina*
Kanu koma kabolkhel jouse ngaidam kakithum in Jesu Hinna kanei jong kasei peh tai. Nang jong leiset a nadei nangaipen sanga Christa nangailut joh nah em? Na lungthim nat jeh ham ahilou le na dongma toh nakiboi jeha julesa naneh em? Lungmonna nape deh ponte. Nang dinga tahsa le lhagao a thina ahijoi. Nadei le nangaipen sangin Christa joh ngailu jon.
Kilungset hinkho hi totna ahipoi. Chujongle akingai ho jong Pathen lungdei bangin hinkho mang u hitin ajehbei a kikhen ti ho bollouvin aphai. Nang jeha khat hinkho setna chu nang chunga jong chutei ding ahi.

1 COMMENT

  1. Hito bang a lha gao lam le, tah sa a kitil khou na thei tah, thusim hoitah le ngaitah hi… Kei din apha chom lheh e.. Maban a jong pakai jalla machal jing un kaki pah e

LEAVE A REPLY

Please enter your comment!
Please enter your name here