Home News Kuki min’a TC kithum hi KNO ading bou hilouva Kuki Nampi ading...

Kuki min’a TC kithum hi KNO ading bou hilouva Kuki Nampi ading ahi tia PS Haokip in Kuki CSO hotoh akihouna a sei ; “KNO in Kuki CSOs hotoh kihoukhom na nei; Kuki min’a TC kithum hi KNO ading bou hilouva Kuki Nampi ading ahi tia PS Haokip in sei”

142
0

NT||NE News
Friday, 05 April 2019

Kuki min’a TC kithum hi KNO ading bou hilouva Kuki Nampi ading ahi tia PS Haokip in Kuki CSO hotoh akihouna a sei

“KNO in Kuki CSOs hotoh kihoukhom na nei; Kuki min’a TC kithum hi KNO ading bou hilouva Kuki Nampi ading ahi tia PS Haokip in sei”

B. Lalboi Gangte
Eimi Times Churachandpur Correspondent

Ccpur, Apr 3 (ET): Kuki National Organisation (KNO) in nam politics akalson na machal dan leh nam politics kibol na machal nathei nading’a Members of Parliament (MP) neilou akhoh dan Kuki CSOs sung’a lamkai hon ahetlou akhoh tah jeh in tuni jinglam nidan 11:00 in B.Aijalon mun’a KNO in Kuki Haosa, Inpi noiya kiloikhomna bahkhai hon pannan kihoukhom naleh ankong sokhomna ananei uvin ahi. Kingon’a chun PS Haokip, President KNO houlimna aneina’a Pathen lungset nan KNO in Govt. toh kihouna akineiyin chuleh 1917 -1919 Anglo Kuki War hi Kuki ten Kum 3 sung Somra track, Chin Hill, Manipur, Nagaland ho’a mitakip kitho in kum 3 sung palai ding umlou in gal anakisat in ahi. Kum sottah Kuki gam nahsah lou in 1990 akipat 1997 sung NSCN-IM in Kuki ho chung’a gal ahin pan kit in nam sung’a gollhang phabep in kivenbit nading’a thal hung kichoi’a lekha sun thei thei in ithusim’u ahin sut utoh lhon’a gollhang hotoh kum 30 lam gal ahin kisat in ahung kikal son tou jing in ahi. Tukhang in India govt. in Kuki te machal na aneithei nading leh kivaihop na tum anei thei nading in Naga hotoh iki kah’u gamgi eikai peh diu kidei jeh in India Govt. toh 2005 kum in Indai Govt. ana vaipo Congress hotoh kinop tona ana kineiyin ahi ati. Hiche toh lhon’a India Govt. toh kihouna pat ahitoh lhon’a KNO in 2017 in Centre Govt. heng’a Kuki Nam mipin adei ho draft anakibol in chule MLA seat 20, MP 2, University atum leh items 40 panna in akingaicha ho thum na anakipelut in ahi. Tuchung Lok Sabha election ah ka mite hou athanop nading uva demand kineiho neisuh bulhit peh uvin ti’a ana kisei na’a AB Mathur jong atha anom in ahi. Nam lamkai hotoh kaki hounao kasuh bulhit ding ahi ati naban’a Naga hotoh jong akiki hou in Naga hon Greater Nagaland aseikit uvin Centre Govt. in jong hahsa akisan Kuki ho ading’a Territorial Council gang tah’a kisubulhit ding ahi tin jong anasei in ahi ati.

Aman aseibena’a tuni Centre Govt. toh KNO kinop to naleh kihou nahi mipin aja bol lou leh KNO hohi Centre in atahsan lou ding hiche naban’a chanvou mu ding ho jouse kichan lo ding ahi ati. Chule Centre Palai hotoh ikihet tothei jeh uva talk u jong chelha thei ahi in Congress hihen lang BJP hijong leh Centre hihen State hijong leh ama hotoh kiki vop di ahi. Tule tu’a BJP ahi jeh’a amaho toh kivop di ti ahin Govt. chu eiho Kuki hon nolthei hilou eiho khel thei jong hilou ahi. Politics ah loi le-gol, melma kiti umlouva Meitei, Naga leh Kuki hi Manipur ah kium ahin golchu galmi’a kisem’a galmi chu gol’a kisem chu mingol ahi. Meilhei toh pankhomna kibul phuna chu District 7 kihondoh akon ahin pankhom nading’a Meitei hotoh kinop tona kinei’a District 7 kihon dohsah ahi. Naga hotoh ki twi neh na umlou lai’a Naga toh pankhom di, lhaikhom bol tahlou ding chuleh KNO in Kuki min’a akingeh jouse Centre Govt. ah kipelut ahi toh lhon’a Kuki hon State hihen lang TC hi jong leh imu nadiu va ama honjong einan tahlou diu ahi. Meilhei CSOs hotoh kikhut jopna kinei ahi toh lhon’a lolhinna imu phat uleh gollhang ho jouse Kuki Regiment hiding ti ahi. KNO hi Centre Govt. toh kihouna kinop tona kinei dungjui’a koi Political Party hi jong leh vaihop na tuh hotoh kihouna chelha jom jing ding ahi tinjong aseibei.

Centre palai ho heng’a Kuki ho hi Naga ho bang’a Govt. dou akihipon India Constitution daanpi noiya kingai cha ho thum na kinei joh ahi. Gambeh atum’a kipohdoh ding kigo lou chule Manipur gam ke sah ding jong kiti ahipoi. Kuki kapu kappa khang uva kipat kagam leiset uva cham le lungmong in kivaipo uving kating Naga hotoh kaki kah’u gamgi neisuh chet peh uvin kiti ahi. KNO in Nampi Politics akalson pilai’a MP masa hon eiho ding’a kikhel na apohdoh lou’u ahin tu’a kihou chaina khat aum ding kon’a MP khat inelou’u akhoh dan leh ngaichat ahi. Kuki khat Parliament ah sollut’a Kuki thu lhangsap sah di kiti ahin

Kuki thingnoi in gam ading’a natoh akinei na’a Nam sepai tamtah thilo hi KNO in totna’a Nam politics kichepi ahipoi ati. District 7 eikipe uhi alhingset ahi pon avat lenpen aum nalai in ahi tinjong aseibei.

Alangkhat’a Kuki le Naga kikah’a gamgi asuhtoh ding uvin India Prime Minister heng ajong lekha thot akipe lut in chuleh Naga hon Kuki gam Greater Nagaland ah apohlut got’u Ukhrul District jong Kangpokpi district akoilut ding chule Bungpi Area ah Khomunnom, Kamsei Mollen, Pasong, Songphel, Mulam, Molnom,Lamlai Chingphei, Zalenbung, Sangkai, Mongkot Chepu, Thawai, Litan Sareikhong, Jaolen, Loutei Kuki, Kamjong District hi Chassad Sub-Division ahin asung’a cheng ho jouse hi Old leh New Kukis ahi naban’a 90% hi Kukis ahi in ahi. Tamenglong District sung’a um Boljang, Kulbung, Meiti, Choro, Phungchong, Jangnomphai, Thomjang, Kamtong, Mollen, Chahkap, H. Vaiphei,Tonglhang, Gilchingnang, Vajang, Jangnouphai, Kulbung, Chassad, Maokot, Aisi, Molvailup, Kul Tuh, Lakhen, Haijang,Mollen, Lanchah, Phungtha,khokai,,Pihang, Phaikoh, Phaimol, Laijang, Khumlhang, Kachouphung leh Gampal ho Churachandpur district ah chonlut ding, Sanapati ah Kho 9 Kangpokpi ah chonlut ding chuleh Tamenlong district ah kho 18 Kangpokpi district alut ding ahi ati. KNO in Nam politics kilhaipi nahi tukum kichai lam leh lolhing ding’a kiki nem ahin KNO in mipi ding’a natoh kinei hi ipilhin na thei ding uva kitong ahi ati. KNO in TC hi keiho ading’a kaki hol’u hilou vin ikibul phu nading uva eiho adia kilhaipi ahi naban’a hiche akon ikipat uva State le adang iki thum thei ding’u ahi.

Dr.Seilen Haokip ahoulimna’a Delhi ah Govt. ki form kit na ding’a Kuki te thakel’a Kuki chapa khat kisollut hen ti ahi in Kuki tehi leiset’a ithu uhi min aha hetcheh ahi tai ati. Kum 70 sung Kuki ho political platform ah kihoupi na koiman einei pi lou’u ahin BJP bou ahi. Amahon eikihoupi jeh’a sotdi jong kiti ahipoi. Chule kinep nathei tamtah aum in Kuki hon kilom tah akal val thil ngeh kinei’a kithum jong ahipon ami leh agam thusim toh kitoh’a political demand kinei ahi naban’a History akon gam kithum hohi ithanei nao ahi ati. Gam kidalha ho jouse jong tuchung akithum na’a aki jaosah soh kei in KNO in political boundary sung bou kithum ahi. Nagaland, Myanmar ho kijaosah lou chuleh Political Dialogue akinei phat leh thal kikoidoh’a table ah kikihou’a angaichat phat leh thal kidom doh kit ji ahi. Igam houhi haosa khut’a detchet’a um ahi naban’a lekha kitup tah nei ihi uvin, political talk 8 vei akinei toh lhon’a election kichai teng a 9 veichan na kinei ding ahi tinjong aseibei.

Nitin Thusoh (Daily News)