Home Lover Corner Kilungsetna Theng

Kilungsetna Theng

167
0

JESU BOU KANGAIPEN-E(Part-I)

(10/02/2019, Issue)

Story by: Crosby Haokip

Kapa damlou jehin ka-insungmiten hospital a pui ding agouvin, hijehchun amaho jong aboicheh tauvin ahi.Hiche lai chun chapang cha kahina laiye. Thinglhang gamʼa khosa kahi jeh uvin dammo aum jongle khosung mihon bus umna kho chen apoh lhung jiu ahi. Hitichun kapa ha dammo val jehin khosung gollhang le mipa phabep akisukhom uvin kapa chu poh ding ati tauvin ahi. Chutia akigot jing laiyu vin kenjong kanu koma,

*Keima:* _“Henu, keijong kahung ding ahi. Kanao jong akap kap-e,”_ katin kanu koma kakiphin tan ahi. Ahinlah kanun,
*CHUNNU:* _“Boi, nang le nanao in-a nani koma anaum lhonin lang kahung kile tengle ball khat kahin choh peh ding ahi.”_
*KEIMA:* _“Henu, kanom mong mong poi. Kahin ngaiyin, nang naum lou le keijong in-a kaum nom poi,”_ katin kanu chunga kakiphin phin tan ahi. Chuin kanun eijolin,
*CHUNNU:* _“Boi, nahung le napa damlou ding ahi,”_ atin ahile keijong kalungdongin,
*KEIMA:* _“Henu, ibola em henu?”_
*CHUNNU:* _“Napan, `Minlal le Naothem chu in-a um lhon hen, amani ahung le genthei lhon ding ahi,ʼ ati,”_ atin ahile kenjong kanao Naothem insunga kapuiyin kalhemin kakichep pi tan ahi.

Chuin kanaovin laina tahin thu aseiyin kajaha,
*KANAO:* _“Heu, henun hepa angaitave na?”_
*KEIMA:* _“Nao, ngaideh tala. Nangin nangai lou ham?”_
*KANAO:* _“Kangai ma ma-e. Ahinlah nangtoh kaum le nom kasa pen e heu,”_ atin ahile kanaovin eingaidan kahen kalungset lheh jenge. Chuin kenjong amakoma,
*KEIMA:* _“Nao, henun hepa damlou hospital a aga pui hija eini jong hepa dinga taona iman peh jing ding chu o.”_
*KANAO:* _“Henge heu, tun jong taona mang hite,”_ atin chuin keinin jong taona kamang lhon tan ahi. Chuin kanaovin kajaha, _“Heu, hema hung tengle keiya dinga dolly eihin choh peh ding, na le?”_
*KEIMA:* _“Henge, ahin choh ding ahi. Chuleh keiya ding jong football ahin choh ding ahi.”_
*KANAO:* _“Heu, nangin koi nangaipen a?”_ atin eidongin, chuin kenjong ajaha,
*KEIMA:* _“Nang chuleh henu le hepa kangaipen-e,”_ katin ahile aman kajaha,
*KANAO:* _“Heu, ken nang kangaipen-e,”_ atin, kanao kalungset valin ahi. Chuin kaniʼn anne dingin eihin kou lhonin, keini jong kache lhon tan ahi.

Janin kanao toh kalum lhon tan ahile kanaovin kanu ahin ngaitan kakoma akiphin tan ahi. Chuin kanaovin kajaha,
*KANAO:* _“Heu, henu kangaiye. Akoma che hite,”_ atin akiphin tan, chuin kenjong,
*KEIMA:* _“Nao, henun hepa damlou hospital a agapui ahin, hepa adam tengle anitah lhona hung lhon ding ahi.”_
*KANAO:* _“Heu, jingle eini jong che hite. Hepa mel jong kamu nom-e.”_
*KEIMA:* _“Nao, hepa adam tengle henu toh hung lhon ding ahi. Eini iche le i-genthei lhon ding jeha in-a ium sah lhon ahi,”_ katin, kenjong kanao kalhimin ahile amajong a-imu tan ahi. Ahinlah jan laiyin adam doh jou lou ding kapan eihung hetsah tan ahi. Jan laiyin kanao ahung kapin ahile kenjong kanao kakoiyin kalhemin ajaha, _“Nao, ibola naka ham?”_ katia kadoh le kanaovin,
*KANAO:* _“Heu, henu le hepa kangaiye,”_ atin, chuin kenjong kalhem kitʼin,
*KEIMA:* _“Nao, kap hihʼin, henu le hepa jingle thaile hung lhon tan te,”_ katin ahile amajong a-imu kit tan ahi. Chuin kanaovin eikoi chah khehin, kalungset valin alu kiss kabolin ka-imu lhon tan ahi.

Jingkah matahʼin kanaovin eihin thouvin kajaha,
*KANAO:* _“Heu, thouvo tunile henu le hepa hung ding ahitai,”_ atin, chuin keijong ka kithouvin, cha ka-om in kadon lhonin ahi. Chuin kanaovin kajaha, _“Heu, henu le hepa hung loi tale kati e,”_ atin, chuin kenjong ajaha,
*KEIMA:* _“Nao, hung vah lhon tan te,”_ katin, chuin ahcha ho changpah kathe peh lhonin ahile kanao nu jong gongsan hi tan tin kajaha,
*KANAO:* _“Heu, henu le hepa ahung tengle ahpi hi kitha taute. Kadu cha vale,”_ atin ahile kalungset valin, kenjong kanao koma,
*KEIMA:* _“Nao, henu le hepa ahung tengle ikitha diu ahi.”_
*KANAO:* _“Heu, ken akang kaneh ding chu o.”_
*KEIMA:* _“Henge nao. Nangin nadu lai lai naneh ding ahi,”_ katile amajong akipahin, chuin kenjong kanao nu kapuiyin Chollha megazine kasim lhonin, thusim kasim kasei peh in ahi.

Nilhah langin kani kei ho in-a ahungin kot ahongin, chang asepin, chuleh ka-in uva mi ahung kikhom pan pan tauvin ahile kalung adongin, chuphatin kenjong kani jaha,
*KEIMA:* _“Heni, ibola in-a mi hung kikhom u ham?”_ katin kadongin ahile kanin kajaha,
*HENI:* _“Boi, tunilhah le nanu le napa hung ding ahitai. Hijeha chu mipi hung kikhomʼa ken an kahon got ahi,”_ atin ahile keijong kakipahin kanao jaha,
*KEIMA:* _“Nao, tunile henu le hepa hung ding ahitai,”_ katile kanao jong akipahin, chuin kanaovin kajaha,
*KANAO:* _“Heu, tah tah a em?”_
*KEIMA:* _“Henge nao, henin jong aseiye,”_ katile kanaovin jong kani koma,
*KANAO:* _“Heni, tunile kanu le kapa hung ding hitam?”_ atin adongin ahile kanin jong,
*HENI:* _“Henge boi, tunile hung lhon ding ahitai,”_ atin chuin kanin keini koma, _“Boi, che lhonin lang kholaiya ga kichem lhon tan,”_ atin, chuin keini jong kichem dingin kache lhon tai. Ka kichep lhon anom valin, keini jong inlam che ding kahe lhon tapon kaloi hotoh mi-in khatʼa kanui polah lah jengun, sot louvin kho ajing tan ahi. Keiho jong chutia nui lhadah dah pumʼa kana kitot jing laiyuvin khonah langʼa gari gin kajauvin, chuin apet pet’in Houin akonin thidah ahung ging tan ahile thip chet in kangai tauvin ahi. Chuin keivang lungdonnan kadim tan polanga kapotdohin ka-in lang u kavet le mei avah chan set tan ahi. Mipi tampi akikhom un, avelʼa gari akingan ahile kanu le kapa hung hi tan te katin ahinlah thidah agin jeh chun kalungnom thei tapon, chuin kanao ahungin kajaha, _“Heu, ipi navet ham?”_ tin eidongin, chuin keinin jong ka-inlam u kahin jon lhon tan ahi.

In kalhun lhonin kanu ka kaja masa pen tan ahile lhasetnan kadimin kakap doh tan ahi. Chuin kanaovin kaka amu phatin kajaha, _“Heu, ibola naka ham ong?”_ atin keini jong insunga kalut lhon tan ahi. Ahinlah kakinepna lhon bang lou behin kapa longdamsa kamu chu chapang kahina lai jeh chun kakap thei pon, ahinlah pindan chomkhatʼa kanu kap chetʼa lumʼa mihon ajen chu kamu phatʼin kakap doh tan ahi. Chuin kanaovin kanu amu phatin kanu jaha, _“Mama ibola naka ham? Kap hih o mama,”_ atin amitlhi atheh peh tan ahi. Chuin kanun kanao nu amu phatin akoiyin akap tan ahi. Kanun kap pum pumin kanao akoiyin ajaha, _“Boi, neingaidam o. Tunia patʼa hi chaga nahi ding ahitai. Napan eidalha tauve,”_ atin hakan akap tan ahi. Chuin akoma nupi khatʼin kanu aphohin ajaha, _“Ibola nachanu koma chutia thu nasei ham? Hisang chun alungmon na din lhem jo tang,”_ atin ahile kanu jong athoudohin kanaonu apomin ahile kanaovin jong ajaha, _“Henu, kap kap tahih o,”_ atin amitlhi atheh peh tan ahi. Chuin achunnu koma, _“Hema kap kap tahih o. Papan eidalha jongle nang naum nai,”_ atin ahile kanu jong akipahin kanaonu akoiyin, _“Boi, chaga nahi poi. Nachunnu kei kaume boi,”_ atin chuin kanaovin kanu jaha, _“Hema, kei dolly le kei uu Football hoiya um ham?”_ atin chuin kanun jong dolly le football ahin la dohin eipe lhon tan ahi. Chuin kanaovin anu jaha, _“Hema kap kap tahiho kichem hite,”_ atin kanu toh akichem lhon tan ahi. Hitichun apa thi helou bangin kanao jong achunnu toh nom tahin akichem lhon tan ahi. Hichun kanaovin kajaha, _“Heu, nang jong o. Mama toh kichem khom ute,”_ atin, chuin keiho nu cha jong room khatʼa ka kichem tauve. Hitichun kapan eidalha ta jongleu kanun lhakhat sung tobang chaga kahi lam lhon eihetsah lhon pon ahi. Hijehchun lhakhat sungin nom tahin hinkho kamang khom uve.
Ahinlah nikhat hi ka-in uva pasal hantah khat hungin kanutoh akihou hou lhon tan ahi. Hijongle chapang kahi jeh chun iman jong kagel pon ahi. Amapan nehthei tampi ahin chon keini jong eipe lhon-e. Chapang kahi lhon nah lai jehin amapan asei jouse chu kana nom lhon e. Nikhat amapan keini koma aseiyin, _“Boi, hepa nei ti lhon tang o. Keile nanun kaumpi jing lhon ding ahin, kei napa thah kahi ding ahi,”_ atin ahile chapang keinin ima kahet them lhon lou jeh chun kakipah lheh lhon e.

Nikhat hi kanun keini koma aseiyin, _“Boi, kei tunile nang le nanao nehthei cho-a kache ding, nangni in-a na naum lhon ding chu o,”_ atin ahile keile kanao jong kanom lhonin kaum lhon tan ahi. Chuin amajong achen, chuleh keile kanao jong kanu ahung kile a nehthei eihin poh peh lhon ding ngahlal pumin kaum lhon tan ahi. Sunin kanaovin kajaha,
*KANAO:* _“Heu, henu itih le hung ding ham? Nehthei kaneh nom tai.”_
*KEIMA:* _“Nao, hung lhung vah tan te,”_ katin kanao kalhamon tan ahi. Chuin kanaovin kajaha,
*KANAO:* _“Heu, henun eihin dalha lhon le hoilang isuh ding hitam?”_
*KEIMA:* _“Nao, henun eini eidalha him him lhon ponte.”_.
*KANAO:* _“Heu, henun eidalha lhon jongle ken nang kanei nahlai jehin lung mong inge,”_ atin ahile kanaonu thusei ho chu lungdon nan kadimin ahi. Chuin kenjong kanaonu jaha
*KEIMA:* _“Nao, henun eini eidalhah lhon mong mong pon te,”_ kanaonu kalhem lhem tan ahi.

Nilhah langin kanute khat keini koma ahungin nehthei eihung pen kajaha, _“Boi, hiche nehthei hi nanun nahin thot ahi,”_ atin ahile kenjong ajaha, _“Henu, kanu hoiya um ham?”_ katin ahile amanjong lung nguitahin eihin ven kajaha, _“Boi, nanun jithah aneitai,”_ atin ahile keijong kamoh ka tan ahi. Chuin kanaovin kajaha,
*KANAO:* _“Heu, ibola naka ham? Kap hiho heu,”_ atin eilhemin, chuin kenjong kanaonu jaha,
*KEIMA:* _“Nao, henun nehthei eihin thot lhone,”_ katin kanaonu kapen ahile aman kajaha,
*KANAO:* _“Heu, henu hung kile nailou ham?”_
*KEIMA:* _“Nao henu tunin hung kile nai ponte,”_ katin kanu jinei kanaonu koma kasei ngam tahlou jehin kalhem tan ahi. Chuin kanaonun jong kipahtahin ane tan ahinlah kenvang kane nom ta pon ahi. Chuin kenjong abonin kanao kape tan ahi.

Kanun seilou beha achate keini eidalhah lhon kagelle ka-imu thei tapon kajan lhiso tan ahi. Kanu chunga kalhase valin kakap khovah tan ahi. Ahinlah kanaovin achunnu jinei lam jong ahe naipon lung mong tahin kakoma alumin ahi. Kanaovin hin hedoh tale ipi ati ta dem tin lunggim nan kadime. Hijehchun nisehin Pathen koma katao jingin ahi. A jingin kanaovin kanu ahol hol tan ahile kenjong ka-im jou tapon kasei peh tan ahi. Chuphatin kanao jong akapin, kanao ka kavet joulou jeh chun kalhemin ahile aman jong kajaha, _“Heu, Henun eidalha lhon ta jongle eini lung mong tahin um hite,”_ atin ahile kanao chunga kakipahin kanao kakoiyin, _“Nao, chaga genthei te Pathen aum nai. Nikho khat le Pathenin phatthei eihin boh lhon thou thou ding ahi,”_ katin kanaonu kalhemin, chuin keinin jong an kane lhon tan ahi. Ahinlah kanao nu vang among jou him him tapon sun le janin akap tan, achunnu akou kou tan ahi. Hijehchun kenjong nisehin asun le janin kajol tan, kanao nu hindan kavet joulou phat le ama het louvin kaga kap jin ahi.

Aban jingle anasim kit taute. Kakipahe asim jouse Pathen in phatthei boh tahen.

©️2018, Crosby Haokip, All Rights Reserved

*Published by _KILUNGSETNA THENG_ Whatsapp Group*