Home News CONGRESS PRESIDENT RAHUL GANDHI IN KITEPNA CHOM CHOM NEI PUM’A ASSAM LEH...

CONGRESS PRESIDENT RAHUL GANDHI IN KITEPNA CHOM CHOM NEI PUM’A ASSAM LEH NAGALAND A ELECTION CAMPAIGN BOL

42
0

NT||Local News
Thursday, 04 April 2019

CONGRESS PRESIDENT RAHUL GANDHI IN KITEPNA CHOM CHOM NEI PUM’A ASSAM LEH NAGALAND A ELECTION CAMPAIGN BOL

“India population a 20 pc migenthei ho kum seh’a dangka 72,000 peh hi ding, lhakhat a income dangka 12,000 noi muho lhaseh a dangka 12,000 peh ding”

“BJP ana lahdoh North East Special Status leh North East Industrial Policy umsah kit hi ding”

By. David Changsan & Sarah Singson
Nitin Thusoh NE Staffs Correspondents

Tuchung a 17 lhinna Lok Sabha Election ding hi Prime Minister Narendra Modi “Thudih-lou” leh Congress “Thudih” kitet lhon ding ahin tin Congress President Rahul Gandhi in jannia Sah-Solam state nih Assam leh Nagaland a Election Campaign aneina ana phondoh bana Congress in election a goljohna aneiya Centre a vai ahin hom ahileh “India population a 20 percent chaga leh genthei ho kum seh leh dangka 72,000 cheh peh hi ding, chuleh lhakhat a income dangka 12,000 noilang muho lhaseh a dangka 12,000 cheh peh ding leh BJP ana lahdoh North East Special Status leh North East Industrial Policy umsah kit ding leh Sah-Solam gamkai mipi’n ana doudal Citizenship Amendments Bill suhmang hi ding ahi tin kitepna ana nei in ahi.

Jannia Congress President Rahul Gandhi in Assam Kaliabor Lok Sabha constituency a sitting MP Gaurav Gogoi a dinga Bokakhar muna election rally aneina a mipi masang a ahoulimna achun tuchung a 17 lhinna Lok Sabha Election ding hi Prime Minister Narendra Modi “Thudih-lou” leh Congress “Thudih” kitet lhon ding ahin, Prime Minister Modi gamsung mipi ho thudih lou, jou leh nal in ana lhem in India mikhat a dangka lakh 15 cheh peh dingin kitepna ana nei in, Congress in India population a 20 percent chaga leh genthei ho kom’a kum seh leh dangka 72,000 cheh kipie jing ding ahi ati.

Prime Minister Narendra Modi in India mikhat a dangka lakh 15 cheh peh dinga kitepna ana nei chu ana subulhing jou pon, hinla aguolpa leh India mihaosa top industrialists Anil Ambani chu dangka crore 30,000 ana pie’n, hiche Anil Ambani apeh dangka crore 30,000 chu lahdoh kit a India population a 20 percent chaga migenthei um hokom a hop a kumseh leh dangka 72,000 cheh kipie ding ahi tin Congress President Gandhi chun ana phongdoh in ahi.

Chuleh PM Modi lamkaina BJP Goverment in India Sah-Solam gamkai miho “Pao leh Ham, Culture leh Tradition” suhset leh suhmang na ding tohguon a Citizenship Amendments Bill Passed bol ding ana guon chu Congress in doudal dinga ana phondoh bangin ana doudal jeh in Bill chu Rajya Sabha a Passed ana kibol pon, hinla BJP National President Amit Shah in BJP vaihomna anei kit leh Bill chu Passed bol dingin ana phongdoh kit in, Congress in Bill chu adoudal jing ding, vaihomna alah leh Bill chu Passed kibol lou ding ahi tin jong Gandhi chun ana phongdoh in ahi.

Congress President Gandhi in mipi masang a ahoulimna achun RSS tosotna noiya BJP in India Sah-Solam gamkai history, culture leh language ho suhsetna ding natoh leh tohguon anei jing suhtang leh suhbeina dinga manchah phapen chu tuchung Lok Sabha Election a BJP thaneina lahdoh a Congress vaihom sah ding hi ahi ati.

Chuleh PM Modi in natohna (employment) crore 2 semdoh dingin kitepna ana nei in, hinla India thusima kum 45 sunga dinga unemployment rate sanpen kuma melchih ahi tia Rahul Gandhi ana sei bana Congress in vai ahin hom leh Goods and Services Taxs (GST) ‘Gabbar Singh Tax’ hi kikhel doh a gamsung a sumkolvei ho phatchom leh khantouna ding kiguong ding ahi jong ati.

Langkhat a jannia Congress President Rahul Gandhi in Lok Sabha seat khat bou umna Nagaland a Congress candidate KL Chishi dinga DDSC stadium a Election Rally ana neina achun India Sah-Solam gamkaiya state ho venbitna ding leh khantouna dinga gamkai Special Status kipie leh North East Industrial Policy leh Special Provision dang dang gamkaiya ana um hochu BJP in ana ladoh hou chu Congress in vai ahin hom aleh kinungkoi ding ahi ati.

Chuleh Congress in India Sah Solam gamkai hi “Region” in akoih pon India leh South East Asia kah’a Lei (bridges) a nei in gamkai khantouna ding in Look East Policy ana boldohe tin jong Milun Gandhi ana seibana Congress vaihomna akipeh ahileh gamsung a lhakhat a income dangka 12,000 noilang muho lhaseh a dangka 12,000 cheh peh dingin jong Congress President chun kitepna ana nei in ahi.

Nitin Thusoh (Daily News)