Home News 1997 kum’a KNF-P in Ccpur Saikul kho’a mi 10 atha ho lhansong...

1997 kum’a KNF-P in Ccpur Saikul kho’a mi 10 atha ho lhansong thah kisempeh hondoh na kinei

37
0

Ccpur, Feb 9 (ET): Churachandpur District hopsung Saikul Kho mun’a 24 June 1997 Memorial Stone Renovation Committee (S24J97MSRC) tohgon naleh YPA Zenhang Lamka lamkai nan tunin June 24, 1997 nikho’a Saikul kho mi 10 thina toh ho lhansong semthah’a um hondoh na anakinei tan ahi. Hetthei khat achesa kum 20 masang June 24, 1997 nilhah’a Kuki National Front-President (KNF-P) hon Saikul khomi pasal jouse akaikhom’a NSCN-IM a ngoh uvin galmanchah mangcha in khosung mi 10 anathat uvin ahi.

Thina toh hochu Ginsuanlal (18) S/o (L) Kaizadam, Kaizadam (50) S/o Dongzam, Tualkapthang (19) S/o Pausianthang, Lamzahau (24) S/o Vungzalian, Lianzachin (19) S/o Pauzanang, Nangson (16) S/o Zelzakham, Chinkhanlian (19) S/o Nekzachin, Khamthangsang (17) S/o (L) Kamkhopau, Pauminthang (45) S/o Lianzakham leh Kamkhopau (45) S/o Lianzakham ahi.

Hiche toh lon’a hiche thilsoh toh kisai in Kuki-Zomi kikah’a 1997-98 kihetkhel na apendoh in inn tamtah hallhah ahi naban’a mihem tamtah in thina anato toh lhona’ Saikul khomi thina toh ho het jing na dia S24J97MSRC in alhansong’u abolthah kiti’a tuni hondoh na anei’u ahi. Kingon kiman chah na Zenhang Lamka Lhanmol mun’a anachelha in hiche achun Johnson in kingon kinei na ajeh anatahlang in chule Pastor. D. Kamchinmang in semthah aum Lhansong Pathen heng’a hondoh na ananeiyin ahi. Chuleh nilhah lam nidan 12:30 in Saikul kho’a kingon ananei uvin hiche achun Pastor. K. Tualkhothangstor, EBCC Saikul in lhansong honna leh lhandoh na ananeiyin chule Thang Johnson, Secretary, S24J97MSRC in Report pehna ananeiyin ahi. Chuleh Zenhang Lamka Lhanmol ah Lhansong kihondoh nakin’a V.Hangkhanlian Minister leh Letboi, Chief of Zenhang Lamka tenin jong houlimna ananei lhon in ahi. V. Hangkhanlian in houlimna aneina’a Saikul khomi thina tohho chu kahet mingen ahi in chule amaho hi thingnoi ahiloudan jong kahechen in ahi ati. Ahin boina nasatah ahungpen doh jeng vang in kicham na ahung umthei kit hi kipa umtah ahi. Hiche akon chun Nam sung’a din khahdoh nakhat ahung hidoh tah toh lhon’a tuni chan’a nam chom chom toh kilungtoh tah’a ki-umthei ahi tinjong aseibei.

Source eimitime